Námskeið í Aðalþingi

Stærðfræði í leikskólastarfi

Fjallað verður um grunn stærðfræði í leikskólastarfi.  Fjallað verður um stærðfræði bæði út frá skipulagi leikskólastarfsins og almennar birtingamyndir þess þar og kynnt notkun námsgagna sem leikskólar geta útbúið og eða tengt stærðfræði.

Kennari: Kristín Dýrfjörð

2 skipti frá 16 -18

Hámarksfjöldi 15 - lágmark 8

Tími:  24 og 25 nóvember

Verð 10.000

Eðlisfræði í leikskólastarfi

Fjallað verður um eðlisfræði í leikskólastarfi. Leiktilraunir með ljós og ljósbylgjur, rafmang og segla.

Hver þátttakandi útbýr lítið leikfang.

2 skipti frá 16 -18.30  (eða einn laugardagur)

Hámarksfjöldi 10  - lágmark 7  

Verð 14.000

Janúar – nánari tímasetning kynnt síðar.

Skuggaleikhús í leikskólastarfi

Fjallað verður um skuggaleikhús, gerðar einfaldar skuggabrúður og leikið með þær. Skuggaleikhús er bæði tæki kennarans og barnanna. Hægt er að nota það til að vinna með félagsfærnisögur sem og til að skapa nýjan vettvang sköpunar fyrir börn

1 skipti – 27. nóvember, laugardagsmorgun frá 10 -13

Hámarksfjöldi 12 - lágmark 8

Verð 7.500

Um fyrirlestraröð Aðalþings

Vorið 2009 fór Aðalþing af stað með fyrirlestraröð um starfið í leikskólanum. Í framhaldi var ákveðið að gera þetta að árlegum atburði. Bæði sem hluta af símenntunaráætlun leikskólans, sem hluti af jafningafræðslu og sem tilboð til annarra. Við álítum að símenntun sé mikilvægur þáttur í starfi leikskólans. Við höfum sett okkur það markmið að gefa flestu starfsfólki tækifæri til að fara erlendis og skoða skóla sem starfa í anda Reggio Emilia og til þess sækja námskeið. Allur ágóði vorfyrirlestraraðar og heimsókna í Aðalþing sem greitt er fyrir renna í starfsmenntunarsjóð. 

Fyrirlestrar í næstu viku

Næstu fyrirlestrar í Aðalþingi verða 5. og 6. maí 2010

Að þróa hlutverkaleik tveggja ára barna.

Erna Hrönn Ólafsdóttir og Helga Hreiðarsdóttir.

Frá því í haust hefur verið hluti af fatnaði af stærð barna í hlutverkastöð á Spóaþingi, en þar eru 2 -3 ára börn.  Þegar kennarar veittu því athygli að börnin voru mjög sjálfbjarga í fatherberginu fóru þeir að velta fyrir sér hversvegna. Hvað í starfinu stuðlaði að umtalssvert meiri sjálfshjálp en þeir höfðu áður séð.  Þeir tengdu á milli hlutverkaleiks og sjálfshjálpar og ákváðu í framhaldið að vinna markvisst með fjölbreyttan fatnað  í stærð barnanna.  Fyrirlesturinn byggir á ljósmynda og myndbandsskráningum.  5. maí.

 „Frá Bamba til Nemó"

Nanna Rúnarsdóttir

Poppmenning og kynbundin áhrif hennar. Fyrirlesturinn byggir á BA verkefni Nönnu.  En í fyrirlestri hennar fjallar hún um föðurímyndir í teiknimyndum.  Í málstofunni verður skoðað hvernig föðurímyndir hafa þróast í teiknimyndum frá Bamba til Nemo litla. Teiknimyndir og poppmenning hafa mikil áhrif á leik barna í leikskólum. Mörg börn eru upptekin við að fara í hlutverk hinna ýmsu hetja,  í leikskólum sjáum við áhrif þess, hvort sem það er Latibær eða Bubbi byggir.  Disney var lengi leiðandi í teiknimyndagerð og þar mótuðust sterkar fyrirmyndir. 6. maí 2010

________________________

Liðnir fyrirlestrar

Ég á lítinn skrýtinn skugga

Anna Katrín Pétursdóttir, verkefnastjóri með sérkennslu

Í leikskólum hafa mótast ýmsar aðferðir við að fylgja börnum eftir og skrá. Ein þeirra er að skyggja börn. En það er aðferð við mat sem hefur m.a. verið kennd við Háskólann á Akureyri undanfarin ár. Að skyggja barn getur falið í sér að velja barn úr kladda og fylgja eftir og skrá í heilan dag eða dagspart eða að fylgja barni sem áhyggjur eru af.  Ýmis nútímatækni er nýtt við að skyggja börn, bæði myndavélar og myndabandsvélar en líka penni og blokk. Unnið er úr skráningum eftir á og skoðað hvort að munstur sjáist t.d. í hegðun eða aðstæðum. Það að skyggja börn vinnur vel með uppeldisfræðilegum skráningum og byggir að hluta á sömu tækni. Anna Katrín mun kynna hvernig hún nýtir þessa tækni sem hjálpartæki í sérkennslu.

Að finna með tánum - upplifun og skynjun eins árs barna

Bentína Tryggvadóttir deildarstjóri á Lóuþingi og Þórunn Marinósdóttir, kennari á Lóuþingi

Ársgömul börn eru upptekin af því að skoða og nema umhverfi sitt, til þess nota þau öll skynfæri sín. Það skiptir því miklu máli fyrir starfsfólk á yngstu deildum að vera opið fyrir hugmyndum og að þora að láta á þær reyna.  Á Lóuþingi yngstu deildinni í Aðalþingi hefur starfsfólk útbúið sérstakt  upplifunarrými. Í fyrirlestrinum verður greint frá þróun upplifunarrýmisins og hvernig börnin nálgast efnivið þar og upplifa hann með öllum kroppnum og hvernig sá upplifun á sér jafnframt stað annarstaðar. Skoðaðar verða bæði myndbands- og ljósmyndaskráningar. Fyrirlesturinn verður byggður upp á bæði dæmum og umræðum.